最近生活雜影-2014年春天

踏入春天, 雨水極多, 但天氣暖左, 小朋友係好湊一點

 

似乎呢個星期都係下雨天, 希望快d出陽光, 有得去戶外玩~

 

昨晩食晚飯影的, 開胃

 

因咩事咁開胃?

 

因為有佢地至愛小菜之一----清炒土豆絲, 即係炒薯條, 只係落鹽快炒, 切功麻麻, 唔夠幼, 趕時間..哈..

 

 

生果王cherie, 可以狂食生果, 尤其最愛blueberry & strawberry~

 

會所畫畫班, 玩埋呢期, 我會explore吓一d可以做吓勞作既美術班, 好似之前join嗰種, 不過大前提都係要夠近時間方便。畫畫勞作絕對係佢興趣~

 

 

午餐後食完甜品超興奮~

   



暴雨天

今日午餐, 去咗將軍澳新都城---上海婆婆

 

上下午的天氣, 有微雨, 仍不是太惡劣

 

 

好食呀~~~

 

想食埋高力豆沙, 但無力再食, 太飽了~ 下次再試~

 

買咗skin food護膚品 同一座風扇, 還有些食具~~~

 

晚餐: 同嫲嫲姑姐表妹喺屋企樓下既商場食, 表妹剛做完baby spa, 而家做baby真係歎啦~

 

走的時候, b爸要送佢地返屋企, 而我喺黑雨中獨力送兩個返去, 雖然係附近, 但不是全程有得遮, 好在有推孖b車, 但三母女都濕了

 

返到去沖沖水, 換好衫就瞓啦, 兩位小姐都冇瞓晏覺, 攰到爆啦~

 

原來有地方落雹, 又一城個商場穿咗, 浸哂, 好得人驚呀~

K1下學期觀課

前日去咗大小姐Charlotte既觀課日

 

喺課室坐足1個鐘15分鐘, 期間都有去playground, 觀察佢地上課的情況

今次非常好, 觀課後我相信安心及開心, 原因係....上學期觀課, charlotte見到我超級唔自在

個人好似硬咗, 唔俾反應老師, 唔敢參與, 要鼓勵好耐先好d



今次, 見佢好自在, 可能大左,  其實見佢平時表現, 喺tom lee一齊上堂既時候, 我覺得佢一直進步, 冇以前咁怕羞~~~

而家放學後, 我由佢地同同學仔喺平台一齊跑吓, 家姐之前都唔太願join 佢地, 好高傲咁, 妹妹反之就好主動同人地玩, 仲玩到好投入, 而家家姐都開始鍾意融入佢地, 一齊跑吓, 笑吓~


講番觀課, 不過佢都係偏向鍾意一個人玩,

去到好似好free咁, 有兩組人分別同兩個miss做嘢, 一組講家居安全, 見miss擰住d藥丸之類, 講下有咩小朋友唔好亂咁掂既嘢, 一組就畫畫, 另外就係有幾個喺側近自由玩玩具, 睇書,


我入去就見到charlotte自己睇書, 跟住自己切吓嘢, 玩煮飯仔呀~

好開心咁

見佢享受返學, 我就好安心

其實我一直考慮緊俾佢讀全日, 但問佢又話唔鍾意

又好似長時間左少少,  人仔細細日日差唔多8小時喺學校, 但係佢地應該會獨立d, 而家都較為依賴, 要陪住瞓, 玩完玩具又唔會主動執.....我都未諗掂, 其實都未必有位......如果兩個都全日, 我又可以多d時間做嘢, 改善家庭既經濟, 始終咩都貴, 學嘢又貴, 去玩又貴, 住又貴.......

又或者再隔多一年先開始?

諗諗先~


前日奶奶朋友送左條魚俾我, 超大條, 我個鑊跟本唔夠大去蒸, 蓋唔到......結果蒸得唔靚......  浪費咗.....嗚嗚嗚~



今日, 好忙呀, 要帶二小姐去健康院檢查, 又要帶大小姐去驗眼中心詳細驗眼~~~

我愛的狗狗

呢半年, 返老爸屋企, 除咗見老爸, 最過癮就係鍾意見呢隻住喺附近既狗仔, 表哥表姐的小狗, 好嗲人呀, 超可愛~


表姐, 姨媽, 大小姐同小狗doughnut的合照,  仲有二小姐攝入鏡頭

 

當日大小姐跟左我地上山拜婆婆, 係第二次拜山, 全程都好乖, 仲學識摺金銀元寶, 回家10幾人食pizza做晚餐~~~



wise kids playroom

剛剛嗰個星期六又去咗Cyberport既wise kids playroom玩

呢個係我地最常去既playroom, 基乎一個月起碼一次

最鍾意係唔多人囉

再加上大小姐二小姐都好喜歡, 大人又玩得舒服, 因為唔係波波池捐嚟捐去, 又要摀低身爬嚟爬去嗰d~~

今次午餐喺food court簡單搞掂, 再加上佢地超愛既yogurt...........




大小姐二小姐食到咁款

Happy Friday 321

今日3月21日, 星期五, happy friday~~~~

兩女既表姐, 即我姪女生日, 15歲啦, 真係大個女啦

想當年, 拖住個人仔, 當年一齊住, 所以同佢都好close吓, 最記得佢3,4歲時, 同佢去街街, 同埋我妹, 大風大兩, 過馬路等燈轉時突然把遮俾風狂吹, 淨番遮柄, 笑死我地3個!!!! 好多呢d趣事回味, 也諗起佢嫲嫲, 即係我媽, 當年佢同個工人姐姐主力湊佢~

而家已經亭亭玉立, 同佢溝通方式當然好大分別, 10年後我兩個囡都差唔多都係咁大, 到時我會點呢, 佢地又點呢? hehe, 到時再諗番起又另一番感覺~

今日雖然happy friday, 但好多嘢令人擔心著, 妹妹嗰班好多同學仔病咗, 昨日有11個人冇返學, 有兩個肺炎, 一個入左院, 聽到小朋友病得咁辛苦, 真係好心痛, 快d打勝仗

我兩個上次流感好番, 但係家姐仲係痰多, 都未清, 周圍都好多菌, 要增強抵抗力, 注意飲食瞓得夠爭取機會做運動先得~ 今日又涼番, 又係陰天..........

妹妹昨日塊面放學後眼肚有血痕, 連皮好深咁刮損, 不是一條普通血痕, 都好深咁既鮮紅好似磨損一躂咁, 老師話係佢自己指甲刮到, 叫我幫佢磨一磨指甲, 的確有少少懷疑, 因為一般刮到唔會咁深卦? 會唔會睇漏眼, 俾乜嘢刮到, 或者曳曳同同學仔爭嘢時碰撞到, 但係都好難知道真相, 心痛著~

架車又未整番,,,,,,來來回回擰去車房整左兩次, 今日再去...........終於問題未解決

昨日b爸放工好晏, join唔到我同兩個夫婦朋友過嚟呢邊餐廳食飯, 我帶埋兩位小姐, 好在佢地好乖, 乖乖自己食, 全程我同朋友傾計冇問題, very good~

仲有仲有, 要讚b爸, 上個weekend, 我兩日都下午自己出咗去, 一日見朋友, 為咗公事, 一日同姐妹high tea, 佢都handle得好好, 我覺得我自由咗少少啦, 哈~

anyway, happy friday!

24吋腰

我有一個夢想, 就係擁有24吋腰, 這個吋數, 實在太遙遠

但係, 我會努力, 因為夏天就快來臨啦

再加上我想今年既家庭相喺夏天影

我已經開始咗一個星期, 盡量每日做運動, 少少都好, 現在每天每晚做20下SIT-UP

20下, 係好少, 但剛剛開始有點吃力, 會慢慢加上去

昨日好天, 去咗跑步

希望呢兩日我會抽到時間跳鄭多燕, 久違了

Charlotte四歲驗眼記

昨日帶咗大小姐Charlotte去驗眼, 結果令人驚訝

原來佢右眼有散光200幾度兼遠視, 好可能要帶眼鏡..............

要去醫院再做一個詳細既檢查

四眼妹..........點樣配合公主既打扮??? omg






兩位小姐食緊花盆嗎? 係美心新產品tiramisu
 

手拖手散散步

昨日仲未俾佢地返學, 休息多一日, 去咗樓下商場散散步, 公園地仲係濕濕地.....好多日好多日已經冇乜陽光, 好似今日好d喎, 陽光快D快D出嚟啦~

最近收到客戶既讚賞, 實在帶俾我另一種既滿足感, 以一個不快不趕既節奏去經營生意, 一方面成就自己, 追求進步, 另一方面平衡生活,  我好滿意, 當然仍需加倍努力。相信佢地上咗小學, 我會可以做到更多呢方面既事~
每個媽媽都會有不同既喜好, 好多媽媽都好叻, 一d都唔hea, 可以湊到幾個, 仲keep到好fit, 抽到時間又要有毅力兼精力做運動, 除咗湊小朋友仲好好經營自己, 打扮自己,  又做到好多好餸, 同小朋友有好多開心既時刻, 整吓勞作仔, 整蛋糕~ 我都要向佢地多多學習~

我都對自己越嚟越有信心, 我覺得每個媽媽都應該要擁有呢份信心, 去過自己同孩子一起享受既生活 ~

Where there is a will, there is a way. And where there is a way, we will!

病病的一週

呢個星期, 大小姐已經冇返過學, 感冒, 星期一開始發燒

發燒, 咳, 鼻水, 昨日睇咗醫生, 今天是星期三, 仍休養中


妹妹今天發燒, 也沒有返學了

半夜起幾次身,  探熱, 餵佢地飲水, 食藥.......

昨晚瞓瞓吓大小姐發忟陣大喊, 本來B爸陪佢瞓, 佢本身攰, 頂唔住, 脾氣又唔好, 大鬧大小姐, 大小姐當然繼續嚎哭,  唔舒服

又係由媽媽嚟安撫番............

快D好番啦, 唔想再聽到咳聲...........................

終於決定跳芭蕾舞啦

事隔差唔多兩年? 最近我又勤力地幫大小姐搵ballet 課程, 冇要求一定要傳統學校, 會所原來都有, 但時間好奇怪, weekday morning.......

由於schedule 地點最啱, 我地試咗栢斯, 冇錯呀, 栢斯都有芭蕾舞學

試堂後確實令我有點兒另眼相看, 因為個miss對小朋友好熱情, 連試衫著咩碼都俾哂意見, 好有溝通, 比起之前2歲零學過嗰間感覺好好多

生性有少少怕羞既charlotte竟然上完堂好開心, 佢話好鍾意個miss, 個miss好勁, 咁有能力冧到小朋友, 連超慢熱既charlotte都搞得掂

套衫仔好靚, charlotte試咗衫之後喺度轉嚟轉去, 走嚟走去, 極之興奮!!!

 

 
 
　

　



(仲未搞得掂相片既問題....???)












呢排緊貼留意新聞有關失蹤飛機事件的跟進, 令人擔心, 咁多日都未搵到未知咩事, 呢個世界真係好多話唔埋, 好多嘢其實都唔係自己控制到, 希望有奇蹟出現............

兩姐妹一起整蛋糕

上個星期四, 兩姐妹一起整香蕉蛋糕

我幾乎全部放手俾佢地整, 倒嘢, "畢"嘢, 攪拌等動作, 我只幫手量嘢, 同準備哂D材料, 食具, 同在旁指導

主要係家姐做, 妹妹也落力幫手,

今次特登用爛香蕉, 即起哂斑勁熟既蕉, 好味好多呀~



 


最好味既一次, 之前同家姐整過幾次啦


材料: 低筋面粉: 150克, 牛油50克, 砂糖150克, 雲呢拿汁幾滴, 蘇打粉3克, 鹽少少, 香蕉3條, 雞蛋1隻

焗爐預熱

先用微波爐整熔牛油,

香蕉去皮搗攔, 然後加入牛油

然後糖, 雲呢拿汁, 蘇打粉, 鹽, 雞蛋

再篩埋面粉入去攪拌, 倒入模具, 入烤箱180度, 30-40分鐘~

競爭

越嚟越感受家長之間既比較, 也感受到小朋友既壓力, 好難講佢地開唔開心, 我都唔識講, 因為大部分小朋友都生活喺咁既情況, 起碼喺香港呢個絕對係大趨勢, 但係感覺到家長對每個小朋友既學業都好大期望, 必須要考入名氣高排名高的學校, 就算離家好遠, 來回超過1個鐘都覺得唔係大問題, 天天都要上興趣班, 甚至幼稚園都要補習, 非常常見~

一直提醒自己, 要俾一個開心充滿愛既家庭環境俾兩個女, 學業成綪會追求進步, 但不會俾太大壓力, 搞到佢地身心疲累, 唔夠瞓, 冇乜時間玩, 甚至唔開心, 或者影響大家既關係~

始終, 為何要生兒育女, 要倒模出另一個名校出身從事高薪厚職的人嗎? 好讓自己可以同人講自己仔女有乜嘢乜嘢成就?  還是想孕育出, 培養出 一個可以成就自己, 發揮自我潛能, 找尋到人生的幸福及熱情, 自己要走的道路的人?

有朋友推介:
http://programme.tvb.com/news/newsmagazine/episode/20140306/

2014.03.06 - 不快樂童年

今日睇唔到, 明天上網睇番先


when talking about raising a smart kid or a happy kid, that is my feeling which has been shared with my friends at fb:

"Peer pressure among parents is very serious and seems to be unavoidable. Many parents especially in hk just tend to think about success and think in comparison when it comes to kids. Getting the kid into top-rated schools seems to be everyone's goal. I now just keep reminding myself why I need to raise children- that is to nurture a healthy and happy kid with a family full of love. hopefully i can stick to it."

Yes, I have to stick to it for the sake of my kids~

互相鼓勵

有幸生活充滿互相鼓勵的精神, 包括兩位小姐都好識得鼓勵我呢個極需要激勵說話既媽咪!!!

今天又出現啦: 大小姐食緊晚餐(有洋蔥豬排, 蒸魚, 白菜仔)途中: 「媽咪煮D嘢真係好好味, 媽咪妳好叻!」

妹妹也會和應：「媽咪好叻!」豎起哂兩隻姆指用力上下揮動, 好正!

讚咗我上天, 謝!

近排多左做司機, 放學後車佢地返屋企, 或者假日去街有時都會由我駛, 等b爸可以休息吓, 我也熟習多d路, 兩女有時都會話：「媽咪好叻!」大小姐會話, 「我第時都要學媽咪咁樣揸車。」這些說話, 為我一腳踢身兼多職極度充實既生活帶來許多鼓舞及動力。

大小姐更加喜愛深情地望住我, 然後話「媽咪妳好靚」, 真係超開心啦, 有咩開心過俾人讚靚, 仲要係自己既寶貝~

我也經常鼓勵身邊屋企人同朋友~

昨天, 我下午2點多入咗SALON電髮, 你估吓我幾點出嚟? OMG, 9點呀, over 6 hours in salon.........結果就係b爸要無得揀下獨自帶兩女去會所食晚餐, 當時仲落雨添, 佢做得好好呀, 處理得好唔錯, 仲做咗好多家務, 聽聞亦冇發癲, good job~ 我都有大讚佢, 以示鼓勵~

大小姐而家學琴, 但萬事起頭難, 而且要學習一樣新事物, 一定要下苦功, 佢彈唔到有時都會講：「好難, 我都唔識」「我真係覺得好難呀........」我都會鼓勵佢, 學每樣嘢都唔容易, 要俾心機努力先會識, 多d專心既練習, 先會有進步。 例如, 以前唔識玩scooter, 而家識。以前唔識畫畫, 而家畫到好多嘢。以前一句英文都唔識, 慢慢累積咁去學習練習, 而家識好多英文。講嘢已經好叻好流利....之類, 也講吓我自己既例子, 講吓佢識既人, 例如, 表姐以前同妳一樣都係一d都唔識彈架, 而家咁叻,係因為佢俾心機去學, 日日去練, 講好多佢成功及身邊人成功既例子俾佢聽, 佢會好快重獲信心及動力~


每天都充滿鼓勵~

互相鼓勵, 永不嫌多~

開心媽媽

做媽媽的生活實在精采萬分, 不只照顧她們那麼簡單, 也需要接觸許多以前不會接觸的層面知識


Ballet school

最近, 忙於搜尋大小姐重回跳Ballet的心水學校, 其實最重要是地點要方便, 不可太遠, 

今天去了一間在太古城, 郭慧芸, 位置都不錯, 不過時間不是太好, weekend已經full哂, weekday 4點多, 其實我會prefer俾佢weekday上, 因為weekend佢要畫畫, 亦要去tom lee上音樂堂, 唔想太緊湊

不過weekday我就要面對帶兩位小姐一齊出門, 問題係, 4點多, 大小姐好可能唔駛瞓, 二小姐會好眼瞓

相信由屋企駛去, 雖然短短5分鐘左右車程, 唔計泊車上落時間, 但二小姐好可能已經睡著了,

咁落車我要推住二小姐, 拖住大小姐芭蕾舞學校, 然後走亦都一樣........最驚係..........大小姐回程時會好攰瞓著覺, 放學後要安排午膳沖涼帶兩女出門口做埋司機再加回程上上落落, 我會唔會太辛苦呢

王仁曼遠咗少少, 最近喺北角,  地點不方便

也會考慮康怡既柏斯, 冇錯呀, 柏斯, 佢地都有芭蕾舞班, 地點方便, 時間明天要問問, 最好有weekday5點半左右既堂就fit啦, 上完堂, 行一陣, 等b爸放工嚟一起食嘢

係咪一定要傳統學校學, 我又唔係太堅持.....

唔係一定要名牌

喺幼稚園方面, 我諗同學仔媽咪都會覺得我異類, 我係冇幫兩位小姐報多個一間學校, 家姐妹妹都係n班直上..

而家讀嗰間近屋企, 佢地又讀得幾開心, 老師都nice, 又適應哂就是了, 冇諗過因為隔離學校多樣phonics學又或者功課會多d深d之類既原因要同兩女再去經歷interview, 周圍搵學校, 好似大部分同學咁喺嗰度讀完n班, 然後轉去區內較為出名既學校

係咪太懶惰呢? 只係我諗唔到點解一定要轉, 一定要兩女咁細又要重新適應唔同既學校

興趣班方便, 大小姐有畫畫、鋼琴、再加上遲少少ballet, 我諗都好夠啦, 英文都有諗過, 主要係會話, 但........諗諗吓, 放學後又要去上堂, 好怪獸.....自己喺屋企教佢地好過, 不過想更有系統性咁教佢地, 要計劃吓

至於二小姐, 仲係細, 只係逢星期六喺栢斯玩既親子音樂班, 輕鬆跳吓唱吓咁

但佢都鍾意跳舞, 大少少會俾佢接觸, 3歲多再搜尋吓吧~ 就算唔跳舞, 佢絕對係sporty既人, 我會考慮埋球類, 佢係明顯地比家姐鍾意球類~


~~~~~~~~

又係目標!!!

講得咁長氣, 因為一路寫, 一路整理咁自己既思緒, 提住自己既方向, 所以我鍾意寫日記

近日, 係忙, 忙於開始我既生意, 搞BR, 開戶, 印卡片, 整理好工作文件, 宣傳工作, 等等等, 冇諗過咁快又咁奇妙地接咗一單特別既工作, 星期一要做, 美容界的

開心迎接新生活, 開心做好每一單工作

目標仍是要做個開心媽媽, 營造開心輕鬆充滿愛既家庭生活, 有自己既事業, 但不用每天工作超過8小時的那種,  最好一半時間是家庭及兩位寶貝, 1/4是自己-休息運動娛樂養生還有伴侶, 1/4是事業及學習, 一年有兩三次外地旅遊, 現在的生活, 仍然是播種期, 但係離我夢想生活越嚟越近~

好想擁有, 希望3年內會達到: 大D既飯枱, 佢地兩個既書枱, 同我既大書枱, 有更多位置放我想要既廚具煮食電器: 大焗爐, 麵包機, 多士爐, 咖啡機, 等等等......添置鋼琴, 按摩椅, 哈, 一定要大d既屋啦~ 也要大d既車.........

我其實我也有嚴重地考慮生第三個....哈哈哈, 我真係好鍾意小朋友架, 但不是我這兩年內要做的, 應該話絕對起碼要避免喺呢兩年內發生, 但b爸唔多想, 佢話將來應該都唔想, 冇共識~


~~~~~~~~~~~~~


這是美好的生活, 現在是, 將來都會是

因為生了兩個女, 造就今天的我, 這是我的生活, 我的人生